Акциите растат, обврзниците паѓаат

Неделата помина во знак на оптимизам на пазарите на акции, додека обврзниците останаа под притисок. Движењата на пазарите беа обликувани од силните економски показатели, повисоките каматни стапки и зајакнувањето на доларот, а геополитичките случувања продолжија да внесуваат неизвесност.

Последната недела од септември беше одлична за инвеститорите во американски сопственички инструменти. Главниот американски индекс S&P 500, мерено во евра, во текот на неделата забележа раст од 1,96 %, додека технолошки ориентираниот Nasdaq во вторникот постигна нов рекорден максимум. Иако неделата ја заврши малку под рекордното ниво, сепак оствари значаен раст, зголемувајќи ја својата вредност во евра за 2,79%. Кон ваквиот принос делумно придонесе и зајакнувањето на американскиот долар, кој бележи нагорен тренд од 16 септември, кога Федералните резерви на САД (ФЕД) ги зголемија каматните стапки за првпат по приближно три години. Во изминатата недела, доларот зајакна во однос на еврото за околу 0,8%.

Покрај акциите, забележан е и раст на приносите на американските државни обврзници, при што приносот на 10-годишната обврзница ја заврши неделата на ниво од 5,16%, што претставува највисока вредност во последните 20 години. Истовремено, во пораст се и каматните стапки за хипотекарните кредити. Според неделната анкета на „Фреди Мек“ (Freddie Mac), просечната каматна стапка за 30-годишен хипотекарен кредит достигна 7,03%, додека според дневниот индекс на „Моргиџ Њуз Дејли“ (Mortgage News Daily) таа изнесуваше дури 7,45%. Наспроти ова, најновите макроекономски податоци укажуваат дека американската економија останува отпорна. Збирниот Индекс на менаџери за набавка (PMI) во септември изнесуваше 58,4, што е највисоко ниво од јули 2021 година, а за ваквите позитивни резултати придонесе пред сè силната домашна побарувачка.

Од макроекономски аспект, неделата во еврозоната беше слична како и во САД, со оглед на тоа што и на овој пазар се евидентираше раст на приносите на државните обврзници. На крајот од неделата, приносот на германската 10-годишна државна обврзница изнесуваше 3,60%, додека на британската беше 5,36%. Објавените податоци за PMI индексот исто така ги надминаа очекувањата, достигнувајќи вредност од 53,1. За разлика од САД, компаниите во еврозоната забележаа и зголемување на бројот на нарачки од странство. Позитивниот сентимент се пренесе и на пазарите на акции, при што главниот европски индекс STOXX Europe 600 ја заврши неделата со раст од приближно половина процент.

Трендот на раст на бараните приноси на државните обврзници не ја заобиколи ниту Јапонија. Приносот на 10-годиншата јапонска државна обврзница на крајот од неделата изнесуваше 3,07%, што е највисоко ниво од 1996 година. Слично како во Европа и САД, и јапонските акции ја завршија неделата во позитивна територија. Иако тамошната берза поради празници минатата недела работеше само во четврток и петок, индексот Nikkei 225, изразен во евра, оствари добивка од 2,54%. На останатите азиски пазари движењата беа поумерени и мешани. Кинеските акции ја завршија неделата во пад, при што хонгконшкиот индекс Hang Seng, пресметан во евра, изгуби 0,24% од вредноста. Под притисок се најдоа пред сè технолошките и останатите растечки акции.

Нешто подобар перформанс покажаа јужнокорејските акции, каде што индексот KOSPI, мерено во евра, забележа раст од 4,83%. Овој раст главно беше поттикнат од технолошките компании и производителите на полупроводници, кои профитираа од континуираните очекувања за силна побарувачка на чипови наменети за вештачка интелигенција. Охрабрувачки беа и податоците за извозот, каде што полупроводниците останаа главен двигател на растот.

На геополитички план, воениот конфликт меѓу Иран и САД продолжува, а цената на нафтата бележи значителни осцилации како одговор на најновите вести за неговиот тек. Наспроти изразените дневни осцилации, цената на еден барел нафта од типот Брент (Brent) се движи околу нивото од 100 американски долари. Дополнително, за првпат по 11 години, кинескиот претседател Си Џинпинг престојуваше во посета на САД. За време на оваа посета, лидерите на двете земји го продолжија трговското примирје, кое во спротивно би истекло во ноември. Станува збор за примирјето склучено во октомври, со кое државите го прекинаа тогашното меѓусебно зголемување на царините и ограничувањето на извозот. Со ова продолжување, трговското примирје ќе остане во сила до 10 јануари.

Автор:

Miha Jazbec