Американските банки ја отворија сезоната на финансиски резултати со рекордни добивки

Послабите јунски податоци за инфлацијата го подобрија расположението кај инвеститорите, додека американските банки со силни финансиски резултати ја отворија сезоната на објавување на резултатите за вториот квартал. Технолошкиот сектор, по исклучително силниот раст, забележа една од своите потешки недели оваа година.

Јунските податоци за инфлација во САД пријатно ги изненадија инвеститорите. Индексот на потрошувачки цени (CPI), пред сè поради пониските цени на енергенсите, на месечно ниво се намали за 0,4%, што претставува најголем едномесечен пад од април 2020 година и значително подобар резултат од пазарните очекувања (консензусот на аналитичарите предвидуваше пад од 0,1%).  

Изненади и базичната инфлација, која ги исклучува цените на храната и енергијата, бидејќи остана непроменета, иако пазарот очекуваше раст од 0,2%. На годишно ниво, вкупната инфлација се забави од 4,2% на 3,5%, додека базичната инфлација се намали од 2,9% на 2,6%. Слична слика покажа и индексот на производствени цени (PPI), кој во јуни неочекувано се намали за 0,3%, додека базичниот PPI со раст од 0,2% остана под очекувањата на аналитичарите (0,3%). Послабите инфлаторни притисоци позитивно влијаеја врз расположението на инвеститорите и ги зацврстија очекувањата дека инфлаторните притисоци од претходните месеци се намалуваат, отворајќи простор за поекспанзивна монетарна политика на Федералните резерви (Fed) во втората половина од годината.

Во изминатата недела, сезоната на објавување на финансиските резултати за вториот квартал, традиционално, ја отворија најголемите американски банки. Bank of America, Citigroup, Goldman Sachs, J.P. Morgan и Wells Fargo ги надминаа очекувањата на аналитичарите, што претставува охрабрувачки почеток на сезоната, во која компаниите вклучени во индексот S&P500 во просек се очекува да остварат раст на добивката од 21% на годишна основа. J.P. Morgan оствари рекордна добивка од 21,2 милијарди американски долари, што претставува раст од 41% во однос на истиот период лани и највисок квартален резултат во историјата на американската банкарска индустрија. 

Goldman Sachs, со раст на приходите од 39%, речиси ја удвои добивката по акција, пред сè благодарение на првичната јавна понуда (IPO) на SpaceX. Банката настапи како главен организатор на понудата (lead underwriter), додека J.P. Morgan, Bank of America и Citigroup учествуваа како ко-преземачи, што им овозможи на сите четири банки да остварат значителни приходи од тргување и провизии. Сличен тренд беше забележан кај сите пет најголеми американски банки, чии вкупни приходи од тргување во кварталот достигнаа речиси 39 милијарди американски долари. 

Тоа укажува дека не станува збор за изолиран успех на една банка, туку за пошироко закрепнување на пазарите на капитал. Објавените резултати позитивно се одразија врз банкарските акции, при што акцијата на Goldman Sachs порасна за 8,59%. 
 

За технолошкиот сектор, изминатата недела беше една од најпредизвикувачките во текот на годинава. По исклучително силниот раст на американскиот полупроводнички индекс SOX во вториот квартал (+90,07%) и високите пазарни вреднувања, инвеститорите започнаа да реализираат дел од остварените добивки. Поттикот за распродажба започна во понеделникот од Азиските пазари, кога јужнокорејскиот производител на мемориски чипови SK Hynix забележа пад на цената на акцијата од 16,34%, откако една аналитичка куќа предупреди дека компанијата можеби нема да ја оствари очекуваната добивка. Значителни загуби претрпеа и акциите на Samsung (-9,33%), поради што главниот берзански индекс во Сеул изгуби речиси 9% од својата вредност. Негативното расположение истиот ден се прелеа и на американските пазари, каде под притисок се најде Micron, кој заедно со двата јужнокорејски производители доминира на глобалниот пазар на мемориски чипови, клучни за развојот на вештачката интелигенција. 
 

Дополнителен притисок врз секторот изврши и IBM, кој во средината на неделата предупреди на послаба побарувачка за деловен софтвер и серверска инфраструктура. Акцијата на компанијата за само еден ден изгуби една четвртина од својата вредност, што претставува најголем дневен пад во нејзината историја. Во меѓувреме, акциите на Micron дополнително ослабеа откако кинескиот конкурент ChangXin Memory Technologies најави голема првична јавна понуда. Под притисок се најде и тајванската TSMC, најголемиот светски производител на чипови по нарачка. Иако компанијата ги надмина очекувањата со своите квартални резултати, најави значително повисоки капитални инвестиции, што инвеститорите го протолкуваа како сигнал дека развојот на инфраструктурата за вештачка интелигенција ќе биде поскап од очекуваното. 
 

Дополнително изненадување во петокот предизвика кинеската компанија Moonshot AI, која го претстави новиот модел за вештачка интелигенција Kimi K3. Според компанијата, моделот нуди перформанси споредливи со водечките американски модели, но по значително пониска цена. Слично како и минатата година по појавата на кинескиот DeepSeek, повторно се отвори прашањето дали огромните инвестиции на американските технолошки компании во развојот на вештачката интелигенција се навистина оправдани во толкав обем. Како последица на тоа, инвестициите во полупроводничкиот сектор (мерено преку индексот MSCI World Semiconductors) во текот на неделата загубија 7,89% од својата вредност. Сепак, и покрај зголемената волатилност, случувањата засега повеќе укажуваат на претпазливост кај инвеститорите по периодот на силен раст, отколку на влошување на фундаментите на секторот.

Автор:

м-р Бјанка Логар